(Видео) Тајфунот „Долфин“ ја погоди Кина: Евакуирани повеќе од милион луѓе, откажани 1.400 летови

Тајфунот „Долфин“ денеска ја погоди источна Кина, при што властите евакуираа повеќе од еден милион луѓе, беа откажани над 1.000 летови, а кинеските метеоролошки власти го прогласија највисокиот степен на предупредување.

Центарот на тајфунот стигнал до копното во близина на градот Јухуан, во источната кинеска провинција Џеџијанг, околу 17:30 часот по локално време. Во моментот на ударот максималната брзина на ветерот во близина на центарот надминувала 150 километри на час.

— реклама —

Само во крајбрежниот град Венџоу биле евакуирани повеќе од 900.000 жители, а биле отворени над 1.000 прифатни центри. Во меѓувреме, речиси 1.400 летови биле откажани на двете главни аеродроми во Шангај.

Последиците од невремето се почувствувале и во Хонг Конг, каде што температурата достигнала рекордни 36,9 степени. Тамошната опсерваторија објаснила дека високите температури се последица на топлиот воздух што тајфунот го придвижил кон градот.

— реклама —

— реклама —

Пред да стигне до Кина, „Долфин“ донел обилни врнежи и силен ветер на јапонската Окинава. Седум лица биле полесно повредени, а меѓу нив бил и маж постар од 100 години, кој паднал и ја удрил главата откако го соборил силен налет на ветер.

На Окинава повеќе од 5.000 домаќинства останале без електрична енергија, додека на Тајван биле прекинати повеќе десетици траектни линии и откажани над 180 летови.

Кинескиот Национален метеоролошки центар претходно издаде црвено предупредување за тајфунот, што е највисок степен на опасност. Се очекуваат исклучително обилни врнежи во делови од Џеџијанг, како и во Шангај и делови од провинциите Фуџијан, Анхуи и Џиангсу.

Се очекува „Долфин“ постепено да ослабне откако ќе навлезе подлабоко во копното и ќе се движи кон северозапад низ источна Кина.