Обвинетиот Илија Спасески се разболел, па поради неговото отсуство се одложи рочиштето за Христијан Пендиков. Адвокатот Димитрија Цобoски, кој е бранител на Спасевски, со медицинска документација го правдаше отсуството. Притоа, побара да му се врати и патната исправа која му е одземена поради опасност од бегство.
„Илија е дома, болен е. Со покренувањето на кривичната постапка како мерки на претпазливост а заради обезбедување на присуство на обвинетиот пред државните органи односно судот и Обвинителството, приложена е патна исправа со цел обвинетиот да не може да ја напушта територијата на Македонија. Со оглед на ваквата дијагноза и нарушена здравствена состојба, а бидејќи воопшто се доведува во прашање компетенцијата на нашите медицински установи за лекување на пациенти, ќе предложам времено да му се врати патната исправа на обвинетиот Спасески, за да може да побара и изврши прегледи во странство“, рече адвокатот Цобoски, бранител на Спасески.
Судијата цитираше дел од извештајот кој беше донесен како оправдување зошто бовиентиот не е во судница.
„Обвинетиот Илија Спасовски поради влошена здравствена состојба, болест, не може да присуствува ан расправата, за што во судот му предавам во оригинал извештај од специјалист, односно суб-специјалист од 11.07.2023 година каде е констатирана дијагноза „тромбофемит“, на долни екстремитетите, со препорака од специјалистот мирување од 15 дена и иницирано боледување за истиот“, цитираше судијата Бојан Мартиноски од извештајот на обвинетиот.
Сведоци двајца беа во судница.
Ова е второ рочиште по ред кое се одложува. На претходното, адвокатите на обвинетиот го напуштија судењето и немаше услови за негово одржување.
Охридското Обвинителството поднесе обвинителен предлог против едно од лицата за кои се смета дека го претепаа секретарот на бугарскиот културен клуб „Цар Борис“ во Охрид, Христијан Пендиков. Тој се бранел со молчење во текот на истражната постапка.
„На 19 јануари во кафе-бар во Охрид обвинетиот најпрвин пристапил до масата на која седел оштетениот и му забележал затоа што се изјаснувал како Бугарин. Подоцна, кога оштетениот го напуштил објектот и се движел кон своето возило, обвинетиот и другото непознато лице почнале да го следат, го нападнале и го удирале со рацете и нозете по главата и телото нанесувајќи му тешки телесни повреди. Во текот на истражната постапка сега обвинетиот се бранеше со молчење, но сите околности беа проверени и потврдени со изјави на сведоци на настанот и со обезбедените снимки од видеонадзорот“, соопшти Обвинителството кога го поднесе обвинителниот акт.
Тепачката се случи на почетокот на јануари.
