Бизнисменот Трифун Костовски, гостувајќи во поткастот „Претрес со Ландов“, месец дена пред против него да биде поднесен обвинителен предлог за стечајот на Еуростандард банка, изјави дека не само што не бега од судска постапка, туку и самиот бара да биде обвинет за, како што рече, пред судот да се открие целата вистина за пропаѓањето на банката.
Костовски категорично негираше дека има вина за стечајот и рече дека токму судскиот процес е местото каде што јавноста ќе може да ги дознае сите околности.
„Јас ја барам правдата. Обвинителството да донесе било каква одлука, за да излезам на суд. И ти и цела јавност да дознае сѐ. Прифатливо е за мене да бидам обвинет“, рече Костовски.
На прашањето дали би ја прифатил судската пресуда доколку биде осуден, тој одговори дека ќе ја признае само доколку е заснована на вистината.
„Судска одлука нема да прифатам ако е лага. Со сила да ме тужи некој, ќе станам како животно. Ќе реагирам на различни начини. Ќе ја тужам мојата Македонија надвор. Ќе ја ставам да биде казнета“, рече Костовски.
Тој зборуваше и за последиците што, според него, ги трпи по стечајот на Еуростандард банка, наведувајќи дека веќе пет години живее со замрзнат имот.
„Пензионер сум тука и во Австрија. Имав приходи кои требаше да ги отуѓам за да ја водам оваа борба. Од никого не барам жалост, само барам да разбере дека станува збор за чесност и достоинство. Тоа не го давам по никоја цена“, рече Костовски.
