Маж е уапсен во Ирска откако неовластено влегол во забранета зона на аеродромот Шенон и оштетил американски воен авион, соопшти полицијата.
Осомничениот, кој е во четириесеттите години, бил приведен во саботата под сомнение за кривично дело оштетување на имот. Според информациите, тој се качил на транспортен авион C-130 Hercules на американските воздухопловни сили, кој бил паркиран на оддалечена позиција во округот Клер.
Ирската полиција Garda Síochána потврди дека мажот влегол во забранетата зона и бил уапсен нешто пред 11 часот, по што е задржан согласно законските процедури. Истрагата за случајот е во тек.
На местото на настанот интервенирале и аеродромската полиција, противпожарните и спасувачките служби на аеродромот, како и припадници на одбранбените сили кои биле на должност.
Поради инцидентот, аеродромските активности биле привремено прекинати. Две полетувања доцнеле, додека еден авион кој пристигнувал од Лурд кружел пред да слета. Од управата на аеродромот информираа дека сообраќајот бил нормализиран за кратко време, откако операциите биле обновени околу 10:15 часот.
