Украинските сили соопштија дека во текот на ноќта извршиле напад со беспилотни летала врз руска воена база во градот Таганрог, при што, според нивните тврдења, биле уништени два руски морнарички авиони Ту-142 и еден балистички ракетен систем „Искандер“.
Информацијата ја објави командантот на украинските Сили за беспилотни системи, Роберт Бровди, познат под прекарот „Маѓар“. Според него, нападот го извел Првиот центар на Силите за беспилотни системи, специјализирана единица за удари врз воени цели и енергетска инфраструктура длабоко на руска територија.
Цел на нападот била воена воздухопловна база во Таганрог, пристанишен град на Азовското Море во Ростовската област.
Ту-142 е далекуметен извидувачко-противподморнички авион на руската морнарица, развиен врз основа на стратешкиот бомбардер Ту-95. Ракетниот систем „Искандер“ е едно од клучните оружја што Русија ги користи во нападите врз украинската територија.
Од руската страна, гувернерот на Ростовската област, Јуриј Сљусар, соопшти дека во нападот избувнал пожар во резервоар за гориво, нафтен танкер и административна зграда во Таганрог. Според него, две лица се повредени.
Таганрог е едно од најважните руски пристаништа на Азовското Море и се наоѓа на нешто повеќе од 40 километри од границата со окупираниот дел од украинската Доњецка област. Градот во последните месеци често е цел на украински напади со беспилотни летала.
Украина во сè поголема мера се потпира на домашно произведени дронови за изведување напади врз цели длабоко во внатрешноста на Русија.
