(Видео) Украина тврди: Русија подготвува уништување на сите стратешки мостови на Днепар

Командантот на 57. моторизирана бригада, Денис Јарославски, тврди дека руското воено раководство издало наредба за уништување на сите стратешки важни мостови на реката Днепар. Според него, Москва ги проучува можностите на оружјето, слабите точки на целите и подготвува детални планови за напади.

Според пишувањата на „Киев пост“ и „Москоу тајмс“, началникот на рускиот Генералштаб, Валериј Герасимов, го известил претседателот Владимир Путин дека руската војска е подготвена за напади врз стратешките мостови во Украина.

— реклама —

Нападите врз мостовите се интензивирале со приближувањето на зимата, паралелно со ударите врз украинските енергетски капацитети. На 1 и 2 октомври бил погоден Јужниот мост во Киев, а потоа следувале напади врз Северниот мост на 3, 4 и 7 ноември. Напади биле регистрирани и врз висечкиот мост во Запорожје на 6 октомври, како и врз Централниот мост во градот Днепар на 30 октомври.

— реклама —

Украинскиот претседател Володимир Зеленски на 9 ноември изјави дека Русија се обидува да ја подели Украина долж реката Днепар и да предизвика што поголеми последици за градовите, селата и секојдневниот живот на населението. Тој посочи дека со воениот врв разговарал за последиците од руските напади врз мостовите и енергетската мрежа.

Експерти за мостовска инфраструктура оценуваат дека овие објекти се изградени да издржат големи оптоварувања и дека оштетувањето на одделни делови не мора да доведе до уривање на целата конструкција. Сепак, предупредуваат дека балистички ракети или серија напади со беспилотни летала би можеле да ги направат премините неупотребливи.

— реклама —

Сообраќајниот експерт Дмитриј Беспалов посочува дека мостовите најчесто се уриваат со поставување експлозив од инженерски единици, а не само со ракетни напади. Тој потсетува дека украинските сили во 2022 година уриваа мостови како дел од активната одбрана.

— реклама —

Во меѓувреме, Украина веќе започнала изградба на алтернативни премини преку Днепар. Според украинскиот портал „Цензор.нет“, планиран е 21 заменски мост, а првите би требало да бидат отворени на почетокот на 2027 година. Министерот за обнова и инфраструктура, Микола Калашник, потврдил дека работите во Киев веќе започнале и дека ги финансира централната власт.