(Видео) Украински дронови погодија енергетска инфраструктура и петрохемиски капацитети во Русија

Украинските напади со беспилотни летала врз руските региони Татарстан и Ростовската област во текот на ноќта предизвикале пожари и оштетувања на петрохемиски капацитети, енергетска инфраструктура и важен сообраќаен мост. Во нападите загинал главниот инженер на една трафостаница во Таганрог, а четири лица биле повредени, соопшти регионалниот гувернер Јуриј Сљусар.

Во Ростовската област биле оштетени две трафостаници во Таганрог, од кои едната ја снабдува со електрична енергија и железничката инфраструктура. Во една од нив избувнал пожар, а поради прекин во напојувањето бил запрен железничкиот сообраќај.

— реклама —

Според анализата на независниот руски медиум АСТРА, една од целите била трафостаницата Т-10, со напон од 220 киловолти, која го снабдува Таганрог и неговата индустриска зона.

— реклама —

Оштетен бил и Мелентјевскиот мост, кој ги поврзува населените места Николаевка и Андреево-Мелентјево. Сообраќајот преку мостот е затворен, а возилата се пренасочуваат преку Таганрог и селото Покровскоје. Во нападите биле оштетени пет возила, а четири лица биле хоспитализирани откако остатоци од соборени дронови паднале врз нивните возила и бензинска станица.

— реклама —

Гувернерот Сљусар соопшти дека руската противвоздушна одбрана во текот на ноќта соборила околу 50 беспилотни летала над Таганрог, Ростов на Дон и седум окрузи во Ростовската област. Тој предупредил дека опасноста од нови напади и понатаму постои.

Истовремено, во рускиот регион Татарстан бил нападнат петрохемискиот комплекс „Нижнекамскнефтехим“, каде што избувнал пожар. Градоначалникот на Нижнекамск, Радмир Бељаев, потврдил дека градот бил цел на напад со беспилотни летала и дека се оштетени објекти во индустриската зона, но не соопштил детали за обемот на штетата.

— реклама —

„Нижнекамскнефтехим“ е еден од најголемите петрохемиски производители во Русија и Европа, специјализиран за производство на синтетичка гума, пластика и етилен.