Депонијата „Вардариште“, која викендов беше зафатена од голем пожар, и денеска продолжува да чади. И утрово граѓаните се гушеа во отровните испарувања од старата депонија, за што сведочат фотографии и снимки направени од жител на Аеродром, кој вели дека ваквата состојба трае веќе три дена. За денеска е најавен и протест.
„На 03.09.2025 во 18 часот, на раскрсницата на булевар АСНОМ со булевар Србија! Дојдете да покажеме колку сме!“, напиша еден жител, во граѓанска група на „Фејсбук“.
Иако повеќе децении граѓаните апелираат за изнаоѓање трајно решение за „Вардариште“, депонијата и натаму претставува извор на загадување. Последниот пожар ја стави под лупа на инспекцијата и полицијата, но и во фокусот на актуелните и кандидатите за градоначалници, кои вчера го посетија просторот со нова низа ветувања.
Жителите на Ново Лисиче и Аеродром најавуваат дека секојдневно ќе излегуваат на улица со протести, сè додека не се најде итно и трајно решение за депонијата, која со години е симбол на негрижа и политички манипулации.
