Прашања за можни финансиски последици врз буџетите на Општина Гази Баба и Град Скопје отвори советникот во Општина Гази Баба, Александар Вељановски, во пресрет на седницата на Советот. Тој посочи на Нацрт-верзијата на Деталниот урбанистички план ЦС09 Блок, кој го опфаќа просторот во близина на „Ист Гејт“, и побара надлежните институции да ги проверат сите околности поврзани со планираната изградба.
Според Вељановски, во Нацрт-ДУП-от се предвидени четири градежни парцели со намена Б5, односно хотелски комплекси, со вкупна површина од околу 141.000 квадратни метри. Тој смета дека ваквата намена отвора дилема дали просторот би можел да биде искористен за изградба на објекти со станбена функција, но со плаќање значително пониски комуналии.
Вељановски посочи дека надоместокот за уредување на градежното земјиште во овој дел од Скопје изнесува околу 180 евра за квадратен метар. Според неговата пресметка, доколку станува збор за станбена намена, за предвидената површина би се платиле околу 25 милиони евра.
Тој тврди дека со хотелска намена, инвеститорот би плаќал само пет проценти од тој износ, односно нешто повеќе од 1,2 милиони евра. Оттука, според неговата пресметка, разликата би изнесувала околу 23,5 милиони евра.
„Дали со овој ДУП директно му се овозможува на инвеститорот да заштеди 23.500.000 евра, пари кои треба да завршат во буџетот на Гази Баба и Град Скопје, а објектите потоа повторно да ги продава како апартмани за живеење?“, праша Вељановски.
Советникот отвори и прашање околу бројот на паркинг-места, посочувајќи дека стандардите за хотелски објекти може да предвидуваат различни услови во однос на станбените згради. Според него, потребно е да се утврди дали со планираната намена на инвеститорот би му се овозможило да обезбеди помал број паркинг-места.
Дополнително, Вељановски праша каков би бил правниот статус на лицата кои би купиле станови или апартмани во објекти заведени како хотели, особено во однос на пријавувањето адреса на живеење.
Тој се повика и на пример од соседна градежна парцела, каде што, како што тврди, веќе се изградени објекти во кои живеат граѓани, но тие се соочуваат со проблеми при пријавувањето на адресата во Министерството за внатрешни работи.
„23,5 милиони евра се пари на граѓаните. Со тие пари се градат градинки, улици и училишта“, порача Вељановски, барајќи надлежните институции да дадат одговор дали со предложениот план постои ризик од оштетување на општинскиот и градскиот буџет.
Тој побара да се утврди дали и кој би сносел одговорност доколку со реализацијата на планот се предизвика финансиска штета и повика целата постапка да биде транспарентно проверена пред носењето на ДУП-от.
