Полицски контроли, укажувања за високи казни и последиците од употреба на пиротехничките средства - но, на улиците и натаму употреба на петарди со силина како на бомба. Ова не се случува било каде, туку во Карпош 4, близу булеварот „Партизански одреди“, каде постојано има проток на луѓе и возила. Полицијата секојдневно кажува колку пиротехника запленила, но граѓаните и натаму немаат мир.
„Последниве два дена, е особено неиздржливо. Ниту полиција, ниту ништо не ги сопира“, велат жители на овој дел од Скопје.
Граѓаните се жалат дека надвор е како на бојно поле. Силината на пукањето на пиротехниката е погласно од вообичаеното, особено што тоа се прави помеѓу згради, па ефектот на звукот е двоен.
Во изминатиот ден, МВР имаше низа контроли и акции. Казнуваа и граѓани кои палеа пиротехника, а беа затекнати од полициски службеници.
