Голем застој на автопатот Велес Скопје, кај патарината Отовица. На наплатната рампа се чека и по 30 минути. На видеото до кое дојде „Макфакс“ се гледа дека колони има во сите ленти, а снегот непрекинато продолжува да трупа.
Регионалниот ЦУК Велес, известува дека преку единствениот број за итни случаи Е-112 е добиена информација за повеќе заглавени возила помеѓу двете патарини на угорнините на дел од дестинацијата од автопатот Велес – Скопје.
За настанатата состојба се известени во ЈП за одржување и заштита на магистралните и регионалните патишта коишто веќе имаат возила на терен што вршат расчистување на наведениот патен правец.
ЦУК информира дека сообраќајот на државните патишта се одвива по влажни коловози, заради врнежи од снег на целата територија на Републиката.
Според известувањето на ЈП за одржување и заштита на магистралните и регионалните патишта забрана за тешки товарни возила има на патните правци: Гостивар-Маврово-Стража-Кичево, Крива Паланка-Деве Баир и Струга-Ќафасан.
На одредени патни правци што поминуваат низ клисури и засеци е можна појава на поситни одрони.
ЈП „Македонија пат“ апелира на внимателно возење и прилагодување на брзината спрема условите на патот.
