Традиционалното одбележување на Битката кај Бојн во Северна Ирска годинава предизвика силни реакции, откако во селото Мојгашел беше запалена макета на џамија со пораки против имиграцијата и радикалниот ислам.
На конструкцијата бил поставен лик со знаме на Исламска држава (ИСИС), како и транспаренти со натписите „Заштитете ги нашите граници“ и „Стоп за заканата од радикалниот ислам“.
Организаторите од здружението „Moygashel Bonfire Association“ соопштија дека биле свесни дека нивната порака може да навреди дел од јавноста, но тврдат дека станува збор за протест против, како што наведуваат, „неконтролирана нелегална масовна имиграција“.
Полицијата го квалификуваше случајот како злосторство од омраза и поднесе обвинение против 56-годишен маж за поттикнување омраза. Осомничениот ги отфрлил обвиненијата, а судот му одбил да биде пуштен со кауција.
Инцидентот беше остро осуден од Англиканската и Католичката црква, кои во заедничко соопштение го оценија како „крајно навредлив“. Британскиот министер за Северна Ирска, Хилари Бен, пак, го нарече „одвратен и кукавички чин на заплашување“.
Традицијата на палење големи огнови во Северна Ирска трае повеќе од три века и е поврзана со прославата на победата на кралот Вилијам III над кралот Џејмс II во 1690 година. Сепак, овие настани со години предизвикуваат контроверзии поради политичките и верските пораки што често ги носат.
