Реплика на џамија поставена на клада во пробританската населба Мојгашел, во близина на Белфаст, беше запалена предвреме, откако полицијата најави дека ќе ја отстрани. Властите инцидентот го оценија како израз на омраза, кој беше осуден од политичари низ Северна Ирска.
Поставката требаше да биде запалена како дел од традиционалните огнови што се палат во пресрет на 12 јули, ден кога протестантските заедници ја одбележуваат победата на Вилијам Орански над кралот Џејмс II во Битката кај Бојн во 1690 година.
Според организаторите, кладата била запалена порано затоа што полицијата се подготвувала да ја отстрани, како што велат, спорната содржина. Од полицијата, пак, соопштија дека доколку кладата не била запалена, местото ќе било обезбедено, а материјалот одземен како доказ.
„Злосторствата од омраза немаат место во нашето општество и нема да бидат толерирани“, изјави началникот на полицијата, Норман Хаслет.
Полицијата соопшти дека 56-годишен маж е обвинет за поттикнување омраза и треба да се појави пред суд.
Британската министерка за Северна Ирска, Хилари Бен, го нарече инцидентот „одвратен и кукавички чин на заплашување“.
Во последните години, на дел од традиционалните клади во лојалистичките средини наместо антикатолички симболи се појавуваат антимигрантски пораки. Минатата година, на истата локација беше запален модел на мигрантски чамец со кукли што претставувале бегалци.
Последниот инцидент доаѓа по неодамнешните антимигрантски немири во Белфаст, кога беа нападнати домови и деловни објекти на припадници на етничките малцинства. На репликата на џамијата имало транспаренти со пораки „Обезбедете ги нашите граници“ и „Запрете ја заканата од радикалниот ислам“, како и фигура што држела предмет налик на нож.
