Украина со ракети со долг дострел „Фламинго ФП-5“ успешно погоди клучен објект на руската воена индустрија во Волгоград, потврди украинскиот претседател Володимир Зеленски.
Цел на нападот беше рускиот Федерален истражувачко-производствен центар „Титан-Барикади“, големо одбранбено претпријатие кое се наоѓа под меѓународни санкции.
Според Зеленски, по погодоците избувнал пожар во фабричкиот комплекс.
„Станува збор за голем индустриски комплекс во кој Русија произведува артилериски системи и специјализирана воена опрема, вклучително и компоненти за ракетни лансирни системи со кои се напаѓа нашиот народ“, изјави Зеленски.
Фабриката „Титан-Барикади“ произведува лансери за стратешките ракетни системи „Јарс“ и „Топол-М“, како и за балистичкиот ракетен систем „Искандер-М“. Претпријатието е дел од руската државна вселенска корпорација „Роскосмос“.
Нападот го потврди и гувернерот на Волгоградската област, Андреј Бочаров, кој соопшти дека во текот на ноќта градот бил погоден од украински воздушни цели. Тој не го именуваше погоденото претпријатие, но наведе дека е оштетен производствен погон во Краснооктјабрскиот округ, каде што се наоѓа фабриката „Титан-Барикади“.
Според руските власти, во нападот биле повредени десет лица, а пожарите биле брзо локализирани.
Нападот е дел од серијата украински удари врз руската воено-индустриска инфраструктура, со кои Киев настојува да ја ослабне способноста на Москва за производство на оружје.
