Директорот на затворот Шутка, Бобан Утковски, за „Скопје1“ изјави дека притвореното лице Боре Видевски во изминатиот период било континуирано медицински третирано и упатувано на специјалистички прегледи.
Според него, во текот на изминатиот месец Видевски повеќепати бил носен на Клиниката за урологија и Клиниката за нефрологија, а потоа и на дополнителни испитувања на биохемија и микробиологија.
„Третиран е извесен период со антибиотска терапија по извештај од специјалист, а по завршување на терапијата повторно е однесен на клиника за урологија и нефрологија, каде е задржан на болничко лекување“, изјави Утковски.
Ова следува откако неговиот адвокат претходно алармираше за сериозно влошена здравствена состојба и можност за дијализа, наведувајќи дека функцијата на бубрегот е значително намалена.
Во меѓувреме, утре во Апелационен суд Скопје ќе се одржи јавна седница по жалбите на Љупчо Палевски, Велибор Манев, Видевски и Влатко Кешишев, кои беа осудени на доживотен затвор за киднапирањата и убиствата на Вања Ѓорчевска и Панче Жежовски.
Осудените бараат укинување на првостепената пресуда и повторување на постапката, додека Обвинителството поднесе жалба во делот на ослободителната пресуда за Александар Ѓорчевски.
Судија-известител за предметот е Лирие Елези-Ајрулау.
Според првостепената пресуда, обвинетите добија по 10 години затвор за грабнувањата, а доживотен затвор за убиствата, кои, како што утврди судот, биле извршени по претходен план и со намера за изнуда на пари.
