Викенд-акција на МВР: 20 лица уапсени, запленети марихуана и кокаин

Дваесет лица се лишени од слобода во текот на викендот во рамки на координираните активности на Работниот тим – Task Force, насочени кон сузбивање на недозволената трговија со наркотична дрога.

Од 2 до 4 октомври, полициските службеници постапувале во 13 случаи на подрачјето на повеќе Сектори за внатрешни работи и Регионални центри за гранични работи. Меѓу приведените се и двајца странски државјани, од Полска и Чешка.

— реклама —

Во рамки на акциите биле извршени повеќе прегледи и претреси на лица, возила, домови и други простории, при што била запленета поголема количина наркотична дрога.

На подрачјето на СВР Струмица, во еден од случаите биле пронајдени и одземени 59 стебла марихуана со вкупна тежина од околу 680 килограми. Во друг случај, полицијата пронашла и одзела голем патнички куфер полн со марихуана.

— реклама —

Во Скопје, при претреси на три локации што ги користело едно лице, биле одземени осум кеси со околу 800 грама марихуана, а лицето било лишено од слобода.

— реклама —

На подрачјето на СВР Велес, при претрес на дом и преглед на лице, биле пронајдени 29 помали кеси со вкупно 15 грама кокаин, 14 грама кафеавкаста материја и околу 5.000 евра.

Дополнително, во рамки на активностите на Одделот за сузбивање на организиран и сериозен криминал биле извршени претреси на четири локации. Две лица биле лишени од слобода, а биле пронајдени и одземени околу 200 грама кокаин, 505 милилитри масло од хашиш и 4,58 грама марихуана.

Од МВР информираат дека за преземените активности ќе следуваат соодветни кривични пријави.

Од Министерството посочуваат дека активностите се дел од засиленото постапување против лицата и криминалните структури инволвирани во производство и недозволена трговија со наркотична дрога и најавуваат продолжување на акциите за откривање на лицата инволвирани во овој вид криминал.