Разрешувањето на Вилма Русковска од обвинителската функција донесе уште две јавни пораки до неа, овојпат од ексфункционери за кои таа покрена обвинение. Експотпретседателката на Собранието од СДСМ, Фросина Ременски, и порача дека ќе се видат во иднина. Додека, експретседателот на Собранието од ВМРО-ДПМНЕ, Трајко Вељаноски и посочува дека допрва ќе одговара.
„Гробарот на правото и правдината падна во сопствената дупка што ја ископа. Одговорноста допрва доаѓа!“, и порача Вељаноски, кој беше обвинет во случајот „Организатори на 27 април“, каде беше неправосилно осуден, а Апелација го врати случајот на ново одлучување.
Подолга порака со објаснување има од Фросина Ременски, која наместо фотографија од Русковска, стави од нејзината плетенка.
„Кога Русковска ќе се пофали јавно дека, ставените на црната листа на САД во неа имаале најголема доверба, тогаш повеќе од очекувано е нејзиното разрешување денес, но и тоа што следи. За почеток таа е прва што го плаќа цехот на нејзините „удбашки услуги“ и многуте други правни гревови во низа. Петте дела од моите објавени написи за "Подемот и падот на Вилма Русковска" напишани во екот на нејзиниот "подем" за брзо ќе бидат дел од едно многу интересно образложение. Таква е судбината на понтонските мостови“, напиша таа.
Ременски беше обвинета во случајот „Меѓународен сојуз“, покренат по обвинение од Вилма Русковска. Кривичен суд ја ослободи, а сега, по жалба одлучува Апелација.
