Фудбалерот на Реал Мадрид и бразилската репрезентација, Винисиус Жуниор, не го крие оптимизмот пред првиот натпревар на Бразил на Светското првенство против Мароко.
Пред дуелот со африканскиот шампион, Винисиус изјави дека „селесао“ е подготвен да испише историја под водство на селекторот Карло Анчелоти.
„Немам никакви сомнежи дека можеме да испишеме историја. Долго се подготвувавме за да бидеме тука и се надевам дека бразилскиот народ ќе нè поддржи. Имаме голема желба да ги израдуваме“, изјави Винисиус.
Тој призна дека очекувањата од Бразил се огромни, имајќи предвид дека станува збор за најтрофејната репрезентација во историјата на Светските првенства.
„Знам дека за многумина не сме фаворити, но сега сите почнуваме од нула. Убеден сум, како и моите соиграчи, дека можеме да одиграме одлично Светско првенство. Притисокот е огромен, но имаме силна желба да ја промениме фудбалската историја на нашата земја“, рече бразилскиот напаѓач.
Винисиус истакна дека се наоѓа во одличен период од кариерата и дека ја чувствува довербата од Анчелоти.
„Во репрезентацијата чувствувам голема слобода и искрена доверба од Анчелоти. Тој верува дека можам да го дадам истиот придонес како во Реал Мадрид. Цврсти сме во одбраната и подготвени за контранапади, токму како што тој бара од нас“, додаде Винисиус.
Тој се осврна и на повредениот Нејмар, посакувајќи му што поскоро враќање на терените.
„Пораснав гледајќи ги неговите потези и обидувајќи се да го имитирам неговиот стил. На фудбалот му е потребен Нејмар, а и нам ни е потребен. Се надевам дека наскоро ќе се врати“, порача Винисиус.
За претстојниот натпревар против Мароко, тој предупреди дека Бразил го очекува тешкиот предизвик.
„Мароко многу напредуваше во последните години. Имаат одлични играчи и нè очекува голем натпревар. Но, Бразил е подготвен да ги освои првите три бода и сакаме да останеме во Америка што е можно подолго“, истакна Винисиус.
