„Вистинска храброст, сила и инспирација“: Беира со целосно оштетен вид од раѓање истрча 21 километар на Скопскиот маратон

Беира Салифоска, позната како Беки, успешно го заврши полумаратонот на Wizz Air Скопскиот маратон, истрчувајќи ги сите 21 километар заедно со својот асистент.

Беира е лице со целосно оштетен вид од раѓање, а учеството на полумаратонската дистанца претставува значаен личен подвиг. Пред неколку години таа учествувала на Скопскиот маратон и тогаш ја завршила трката на 5 километри. Овојпат се соочи со повеќе од четирипати подолга дистанца.

— реклама —

„21 километар храброст, сила и инспирација! Денес нашата колешка Беира, заедно со својот асистент, успешно истрча 21 км на Wizz Air маратонот“, објавија од Државното училиште за деца и младинци со оштетен вид „Димитар Влахов“ – Скопје.

— реклама —

Од училиштето посочија дека Беира повторно покажала колку значат упорноста, поддршката и силната волја.

„Горди сме на тебе, Беира! Ти си вистинска инспирација“, порачаа од училиштето.

— реклама —

Нејзиниот успех не е поврзан само со спортот. Беира е и првото лице со оштетен вид во земјава кое одбранило дипломска работа напишана на Брајово писмо.

— реклама —

Од академскиот успех до полумаратонот долг 21 километар, нејзината приказна е исполнета со лични предизвици и постојано поместување на сопствените граници.

За Беира, трката не била само прашање на времето постигнато на патеката. Таа била уште една цел до која стигнала чекор по чекор и километар по километар, со поддршката од својот асистент и со решителност да стигне до целта.