Храбриот потег на жителот Аце, кој со својот трактор влегол директно во пожарот за да помогне во заштитата на домовите на неговите соселани, го привлече вниманието на јавноста по објавата на Ина Многуфина на Фејсбук.
Многуфина во објавата раскажува за драматичната борба со огнената стихија во пелагониските села Ивањевци, Лознани и Новоселани, каде што пожарот брзо се проширил поради сувата трева и ветерот и во еден момент се приближил на околу 50 метри од куќите.
Според нејзиното сведоштво, жителите веднаш излегле на терен и, секој со она што го имал, се вклучил во гаснењето. И покрај пристигнувањето на пожарникарите, пожарот продолжил да се шири, а дополнително биле ангажирани и околу 20 доброволци.
Во тие критични моменти, според Многуфина, во борбата се вклучил и Аце од едно од селата. Тој го зел својот голем трактор и влегол директно во пожарот, орајќи по линијата на огнот и затрупувајќи го пламенот со земја.
Таа го опишува неговиот потег како исклучително храбар и ризичен, со кој помогнал да се спречи огнот да стигне до куќите.
Остатокот од пожарот, како што наведува Многуфина, го гаселе заеднички жителите, професионалните пожарникари и доброволците.
„Вистинските херои немаат ПР и агенции да ги прават херои, туку стварно се херои, се покажуваат на дело“, напиша Многуфина, споделувајќи ја приказната за Аце и останатите жители кои учествувале во борбата со пожарот.
Таа додава дека ваквите луѓе се пример за храброст и солидарност и дека нивните постапки се приказни кои долго ќе се паметат во заедниците.
