Премиерот Христијан Мицкоски потврди дека на денешната владина седница ќе биде утврдено името на новиот државен јавен обвинител. Предлогот потоа ќе биде доставен до Собранието на финално изгласување.
„Денес ќе имаме владина седница и на таа владина седница ќе се дознае името на идниот јавен обвинител или обвинителка и ќе биде доставено до Парламентот“, изјави претседателот на Владата Христијан Мицкоски.
Иако првично се пријавија петмина, Советот на јавни обвинители даде „зелено светло“ за четворица кандидати: Анита Тополова-Исајловска (сегашна в.д. обвинителка), Ленче Ристоска, Лидија Раичевиќ и судијата Ненад Савевски.
Новиот обвинител се избира во Собранието со мнозинство од 61 глас. Тој ќе дојде на местото на Љупчо Коцевски, кој поднесе оставка во декември минатата година.
