Владата го одби амандманот на СДСМ за над една милијарда денари дополнителна поддршка за земјоделците

Владата го одби амандманот на СДСМ со кој се бараше дополнителна финансиска поддршка од над една милијарда денари за земјоделците, како и исплата на заостанатите субвенции и исполнување на обврските кон земјоделските производители.

На собраниската седница, пратеникот на СДСМ Љупчо Николовски предупреди дека поддршката за земјоделството се намалува, додека долговите кон производителите достигнале 10 милијарди денари. Тој посочи и дека во 2026 година има 10.000 земјоделци помалку пријавени за субвенции.

— реклама —

Повикувајќи се на завршните извештаи на Платежната агенција, Николовски рече дека во 2025 година биле исплатени околу 6,2 милијарди денари субвенции, наспроти повеќе од осум милијарди денари во 2023 и 2024 година. Според него, тоа значи од 50 до 60 милиони евра помалку исплатена поддршка.

Тој ги критикуваше промените во условите за добивање субвенции, меѓу кои останувањето на обврската за предавање 30 проценти од производството, иако претходно било најавено нејзино укинување. Посочи и на зголемените прагови кај поледелството и лозарството, како и на воведувањето поддршка само за сертифициран семенски материјал.

— реклама —

Николовски рече дека се укинати и авансните исплати на субвенциите, кои претходно овозможувале земјоделците да добијат 30 проценти од поддршката однапред. Според него, нарушена е и претходно воспоставената динамика на исплата, што предизвикало незадоволство и протести кај производителите.

— реклама —

Како пример за намалувањето на поддршката, тој ги посочи субвенциите за говеда, кои, според неговите наводи, се намалени од 12.000 на 8.000 денари. Истовремено, биле зголемени лимитите за големите производители, а укинати повеќе програми наменети за малите земјоделци.

Николовски ја критикуваше и поддршката од 10 милиони евра за откупувачите на грозје, преку Македонската банка за поддршка на развојот, додека лозарите, како што рече, останале без директна финансиска помош. Тој укажа и на ниските откупни цени на оризот и тешката состојба на јаболкопроизводителите.

Дополнително, предупреди дека две години нема нови повици за ИПАРД-програмата. Според него, во претходните седум години, во периодот од јануари до септември, биле објавувани просечно по 12 повици од Програмата за рурален развој, додека сега има само еден. Тој додаде дека во изминатите две години не бил доделен ниту еден трактор преку владини повици.

„Ако за нешто требаат пари во буџетот, тоа е за земјоделците, за да го зачуваме достоинството, да се цени нивниот труд и таа поддршка да се зголемува“, порача Николовски, оценувајќи дека земјоделството не е приоритет на Владата.