„Власта ги става во ризик водата, полињата и егзистенцијата на земјоделците“, вели Филипче

Изградбата на дата-центри во земјава може да има сериозни последици врз водните ресурси и земјоделството, предупреди претседателот на СДСМ, Венко Филипче, поставувајќи прашања за тоа колкави количества вода ќе се користат за нивно ладење и како тоа би се одразило врз земјоделците.

— реклама —

Филипче оцени дека земјоделскиот сектор, кој и досега се соочува со низа проблеми, не смее дополнително да биде изложен на ризик поради потенцијално пренасочување на водните ресурси кон дата-центрите.

„Дали тоа значи дека огромната количина на вода којашто ќе ја користат дата-центрите коишто организираната криминална група на ВМРО сака да ги прави кај нас, ќе ги остави нашите полиња и земјоделците без водоснабдување? Дали тоа значи дека ова целосно запоставување на земјоделскиот сектор дополнително ќе претрпи удар поради тоа што водата ќе биде пренасочена за ладење на таканаречените дата-центри“, рече Филипче.

— реклама —

Тој посочи дека земјоделците веќе тешко ја обезбедуваат својата егзистенција, а како дополнителен проблем ги наведе неисплатените субвенции и ниските откупни цени.

— реклама —

Филипче отвори и прашање за влијанието на системите за ладење врз животната средина, особено во случаите кога се користи вода која потоа се враќа во природните водотеци.

„Што ќе се случи со топлата вода, каде ќе се врати назад и како таа ќе се ефектуира на биодиверзитетот во реките? Дали тоа значи дека ќе се уништи живиот свет? Поради тоа што значително се загрева водата којашто овие дата-центри ја користат“, праша Филипче.

Според него, пред носењето одлуки за вакви проекти мора да се разгледаат сите можни последици врз водоснабдувањето, земјоделството и животната средина.