ВМРО-ДПМНЕ бара да се укине „Мој ДДВ“, а парите да се дадат на фирми кои платиле повисок данок

Мерката „Мој ДДВ„ да се укине, а со тие пари од буџетот да се обештетат граѓаните кои платиле повисок данок со воведувањето на прогресивното оданочување што владата деновиве го замрзна. Ова е барањето на ВМРО-ДПМНЕ, кое денеска го образложи поранешниот министер за финансии, Трајко Славевски. Вели и дека владата треба целосно да го укине прогресивниот данок, а не само да го одложи. Доколку не го сторат тоа, ова ќе биде една од првите мерки што ќе ја преземе ВМРО-ДПМНЕ доколку се вратат на власт.

— реклама —

Славевски вели дека со прогресивниот данок, СДСМ вовеле идеолошка конфузија, заснована на погрешни факти. Тврди дека со ова е направена штета на повеќе полиња, почнувајќи од зголемена даночна евазија, бегство на капиталот во соседните земји, ниска наплата на даноците, заминување на млади ИТ професионалци и лекари од земјава, покачување на кириите на становите и деловниот простор, застој на странските инвестиции. Од друга страна, вели, не е постигната целта за намалување на нееднаквоста, затоа што таа се намалува со други мерки за економски раст.

— реклама —

Сето ова го призна и премиерот, кој вчера изјави дека, прогресивниот данок не ги дал. Како причина го наведе опкружувањето од држави со ниски и рамни даноци. Рече дека, државата влегла неподготвена да ги заштити информатичарите, како и академската класа, која генерира приход над 18.000 евра годишно или 1.500 евра месечно, а кои отворале сметки и ги селеле своите компании во Косово, Србија и Бугарија, за да го избегнат повисокиот данок. Истовремено ја призна и можноста, поради тоа, странските компании да не се мотивирани да вложуваат во земјава.