ВМРО-ДПМНЕ преку соопштение обвини дека СДС се обидува да извлече политичка корист од состојбата со водоснабдувањето во Гостивар, наместо да побара одговорност од локалните власти, за кои велат дека се поддржани од СДС, ДУИ и Арбен Таравари.
Од партијата истакнуваат дека владините институции активно работат на терен и преземаат мерки за целосно стабилизирање на состојбата. Според нив, бројот на граѓани кои бараат медицинска помош постојано се намалува, што, како што наведуваат, укажува на подобрување на состојбата.
Во соопштението се додава дека во наредните денови се очекува воспоставување редовно водоснабдување со технички исправна вода.
Од ВМРО-ДПМНЕ тврдат дека СДС во своите јавни настапи користи неточни информации и застарени извештаи, со што, според нив, создава непотребна загриженост и паника кај граѓаните, иако процесот на нормализирање е во завршна фаза.
Партијата потсетува и на, како што наведува, неточните тврдења на СДС за квалитетот на водата во Валандово, истакнувајќи дека вонредните анализи ги демантирале тие наводи.
Во реакцијата се посочува дека наместо, како што велат, да шири дезинформации, СДС треба да побара одговорност од градоначалникот на Гостивар, Валбон Лимани.
Од ВМРО-ДПМНЕ апелираат граѓаните да останат спокојни, нагласувајќи дека институциите преземаат конкретни мерки и дека процесот на стабилизирање на состојбата во Гостивар е при самиот крај.
