ВМРО-ДПМНЕ реагира на обвинувањата на СДС, оценувајќи дека партијата се обидува да направи спектакл од нешто што не постои. Во соопштението се наведува дека додека СДС тврди дека „во Македонија има назадување и загрозување на слободата“, објавените податоци ги демантираат нивните тврдења.
Според извештајот на Freedom House за 2025 година, слободите во државата се во нагорна линија, односно има „зголемување на слободата“. Во соопштението се нагласува дека „ова е реткост во регионот, бидејќи речиси сите соседни држави бележат пад“, а тоа може да се види и од објавената слика од СДС самиот.
Во категоријата „делумно слободни“ земји, Македонија со индекс на слобода 67 се наоѓа заедно со Црна Гора (69), Албанија (68), Косово (60), Србија (56) и Босна и Херцеговина (52). Од овие податоци, според ВМРО-ДПМНЕ, „земјите што се пред нас, Црна Гора и Албанија, имаат само минимална предност“.
Во соопштението се додава: „Кога СДС вели дека во Македонија се загрозени слободите, им порачуваме дека во државата ништо не е загрозено, освен опстанокот на СДС на политичката сцена, која стана трета партија во државата и петта во Скопје. Изгубени во својата безидејност, со сигурни чекори се движат кон биолошкиот праг и кон целосно исчезнување.“
