ВМРО-ДПМНЕ обвини дека претседателот на СДСМ, Венко Филипче, застанал на страната на бугарските барања за уставни измени, додека владејачката партија, како што велат, останува на позицијата за заштита на македонските национални интереси.
Според ВМРО-ДПМНЕ, уставните измени не се последен, туку прв услов во низата барања што Бугарија би можела да ги поставува кон Македонија во иднина.
„Отворањето на Уставот значи отворање на Пандорината кутија за нови условувања, нови притисоци и нови удари врз македонскиот идентитет“, се наведува во партиското соопштение.
Од партијата ја критикуваат политиката на поранешната власт предводена од СДСМ и ДУИ, оценувајќи дека ја довела државата во подредена позиција и создала простор за постојани уцени кон Македонија.
Во реакцијата се посочува дека Филипче е „најгласниот промотор“ на политиките поврзани со уставните измени, додека ВМРО-ДПМНЕ, според нив, води принципиелна политика во одбрана на националните интереси.
„Над 80 проценти од граѓаните даваат поддршка на меѓународната политика на ВМРО-ДПМНЕ, додека од другата страна специјалниот бугарски пратеник Венко Филипче промовира наредби од Радев кои се косат со македонските интереси“, велат од партијата.
Од ВМРО-ДПМНЕ порачуваат дека Македонија нема да прифаќа нови условувања, ниту ќе дозволи националните интереси да бидат жртвувани за политички цели.
„Македонија нема да тргува со својот идентитет. Времето на капитулации заврши“, стои во соопштението.
