ВМРО-ДПМНЕ реагира на денешната прес-конференција на СДСМ, обвинувајќи ја опозициската партија и нејзиното актуелно раководство за, како што велат, „лаги и манипулации“ во јавноста.
„Кога станува збор за СДС и актуелното раководство, нема ништо ново освен лаги и манипулации во јавноста. А кога ќе бидат фатени, тогаш стануваат нервозни и зборуваат нелогични работи“, велат од ВМРО-ДПМНЕ.
Од партијата го обвинуваат лидерот на СДСМ, Венко Филипче, дека за време на настан на ВМРО-ДПМНЕ во Ново Село биле испратени лица кои, како што тврдат, предизвикале инцидент.
„Венко Филипче во Ново Село, кога ВМРО-ДПМНЕ имаше настан, одлучи да прати насилници, трговци на дрога да прават инцидент. Дополнително, едниот од нив излезе и самиот ја потврди тезата, односно нашите кажувања“, наведуваат од ВМРО-ДПМНЕ.
Оттаму додаваат дека Филипче е „нервозен“ поради тоа што, како што велат, „талогот исплива на површина“.
„Лицата пратени во Ново Село од Филипче не можат да бидат иднина на Македонија. Тие се олицетворение на лицата Зоран Заев, Венко Филипче и слично“, се наведува во реакцијата.
Од ВМРО-ДПМНЕ упатуваат и критики кон поранешниот премиер Зоран Заев и Венко Филипче, поврзувајќи ги со трагичните настани во модуларната болница во Тетово, сообраќајната несреќа кај Ласкарци и бројот на починати за време на пандемијата.
Според партијата, одговорност за овие случаи нема поради, како што тврдат, влијанието што Заев и Филипче сè уште го имаат во правосудниот систем.
„И наместо да се засрамат и да прекинат со срамните и опасни дејствија во општеството, тие продолжуваат по лошиот пат. Не само што продолжуваат, туку тонат одејќи по истиот пат“, порачаа од ВМРО-ДПМНЕ.
