ВМРО-ДПМНЕ го обвини Филипче за навреди кон починатиот градоначалник на Брвеница

ВМРО-ДПМНЕ упати остри критики до претседателот на СДСМ, Венко Филипче, обвинувајќи го за несоодветни навреди кон починатиот градоначалник на Брвеница, Јовица Илиевски, кој беше избран од редовите на владејачката партија.

— реклама —

Од партијата велат дека се згрозени од изјавите на Филипче, во кои, како што наведуваат, Илиевски бил доведен во контекст на криминал и незаконско работење.

— реклама —

„Ваквото однесување покажува дека Венко Филипче е во специфична состојба и ги поминува сите граници“, се наведува во реакцијата на ВМРО-ДПМНЕ.

Од партијата додаваат дека нема да возвраќаат со иста реторика, но сметаат дека Филипче треба да покаже почит кон починатиот градоначалник и неговото семејство.

— реклама —

Во реакцијата се истакнува дека Јовица Илиевски важел за мирен, семеен и чесен човек, кој двапати по ред ја добил довербата на жителите на Општина Брвеница.

Од ВМРО-ДПМНЕ оценуваат дека граѓаните ќе го запомнат однесувањето на Филипче и ќе го имаат предвид при следното гласање.