Опозициската ВМРО-ДПМНЕ бара правда, а не амнестија за обвинетите за 27 април, рече генералниот секретар на партијата, Игор Јанушев на прес конференција за понуденото помирување од страна на премиерот Зоран Заев за настаните на 27 април, минатата година.
„Не станува збор за амнестија, туку за правда во еден голем и монтиран случај“, рече тој запрашан дали ја отфрлаат понудата на Заев.
Од самите почетоци ВМРО-ДПМНЕ твдеше дека случајот 27. април е политички фабрикуван случај, без докази и без аргументи и наменет за политички притисоци. Педесетина луѓе се соочуваат со политички прогон со цел Заев да може да тргува со нинвата слобода, а за возврат да бара поддршка на Договорот со Грција за промена на името на Република Македонија, обвини генералниот секретар на ВМРО-ДПМНЕ Игор Јанушев, на денешната прес-конференција.
-Ова јасно покажува дека власта не само за 27-ми април, туку и за други случаи против луѓе од ВМРО-ДПМНЕ води политичка хајка само за да тргува за нивната слобода. Крајно неморално и крајно неетички, вели тој.
