ВМРО-ДПМНЕ преку соопштение реагираше на прес-конференцијата на портпаролката на СДСМ, Богданка Кузеска, оценувајќи дека случајот со вработениот во Службата за општи и заеднички работи (СОЗР) е доказ дека институциите функционираат и дека борбата против криминалот и корупцијата е засилена.
Од владејачката партија велат дека со доаѓањето на ВМРО-ДПМНЕ на власт се менува системот и дека надлежните институции постапуваат во случаи на сомнение за криминал и корупција.
„Таков е и случајот со вработениот во СОЗР, кој бил фатен од институциите со бележани пари“, наведуваат од ВМРО-ДПМНЕ.
Од партијата додаваат дека ваквото постапување, според нив, било незамисливо за време на претходната власт предводена од СДСМ, Зоран Заев и Венко Филипче.
ВМРО-ДПМНЕ во реакцијата го обвинува СДСМ дека не може да прифати некој да одговара пред институциите за сторен криминал или корупција, без оглед на неговата политичка или друга припадност.
„На СДС не им е јасно како може некој да одговара за сторен криминал или корупција, а да не е заштитен од институциите како што се заштитени нивните кадри на чело со Венко Филипче“, стои во реакцијата.
