ВМРО-ДПМНЕ преку соопштение обвинува дека повеќе од 400 извештаи за квалитетот на водата во Гостивар биле доставувани до надлежните институции, но дека поранешниот министер за здравство Венко Филипче и Рената Младеновска со години не презеле конкретни мерки.
Од партијата велат дека Филипче денес се обидува да ја префрли одговорноста, иако, според нив, имал информации и документација за состојбата со водата.
„Гостиварци заслужуваат да знаат зошто Филипче ја имал документацијата за загадената вода, знаел и одлучил да молчи и да не преземе ниту еден конкретен чекор“, велат од ВМРО-ДПМНЕ.
Од партијата додаваат дека Владата предводена од ВМРО-ДПМНЕ интервенирала со обезбедување техничка и флаширана вода за граѓаните, додека институциите работат на справување со актуелната состојба.
ВМРО-ДПМНЕ бара Јавното обвинителство да отвори случај и да ја испита документацијата што беше објавена во јавноста, со цел да се утврди кој бил информиран за проблемот и дали имало пропусти во постапувањето.
„Здравјето на граѓаните во Гостивар не смее да биде предмет на политички игри. Одговорност мора да има за секој што знаел, а молчел“, наведуваат од партијата.
