ВМРО-ДПМНЕ најавува нов инвестициски циклус во Карпош: Градинка, спортски сали и мега-парк

ВМРО-ДПМНЕ соопшти дека во Општина Карпош продолжува реализацијата на проекти во инфраструктурата, комуналната хигиена, спортот и зеленилото, а во следниот период се најавуваат нова детска градинка, спортски сали и реконструкција на мега-паркот во Карпош 4.

Од партијата велат дека фокусот во изминатиот период бил ставен на чистотата, инфраструктурата и подобрувањето на условите за живот на жителите.

— реклама —

Според соопштението, на повеќе критични локации биле расчистени над 3.500 кубни метри наталожен материјал, додека со отстранување хаварисани возила од јавните површини биле ослободени повеќе од 150 паркинг-места.

Во делот на патната инфраструктура, ВМРО-ДПМНЕ наведува дека се реконструирани улиците „Џумајска“ и „Трифун Бузев“, како и дел од улицата „Бранислав Нушиќ“, додека се работи и на улицата „Јуриј Гагарин“ во Козле.

— реклама —

Меѓу позначајните проекти што се реализираат е изградбата на новата детска градинка „Пролет 2“ во Козле. Според претходно презентираните информации од градоначалникот на Карпош, Сотир Лукровски, објектот е предвиден за 130 деца и треба да располага со современи услови, простор за игра и зеленило.

Од партијата најавуваат и инвестиции во спортската инфраструктура. Во Влае се гради нова повеќенаменска спортска сала во ООУ „Димо Хаџи Димов“ со површина од околу 1.400 квадратни метри, а започната е изградба на повеќенаменска сала и во ООУ „Братство“.

— реклама —

Како еден од следните поголеми зафати е најавена и реконструкцијата на мега-паркот во Карпош 4, проект кој, според локалната власт, треба дополнително да го уреди зеленилото и јавниот простор во овој дел од општината.

Во изминатиот период, според ВМРО-ДПМНЕ, целосно биле обновени и повеќе детски и спортски игралишта. Меѓу локациите се просторот кај фонтаната во Карпош 3, плоштадот спроти студентскиот дом „Гоце Делчев“, улицата „Никола Парапунов“ спроти „Специјал“, дворот на ООУ „Јан Амос Коменски“, улицата „Љубљанска“ кај Адреналинскиот парк и повеќе локации на улицата „Јуриј Гагарин“.

— реклама —

Обновувања, според партијата, биле направени и на Млечен, во Жданец кај спортските терени, на улицата „Козле“ и во Нерези.

„Фокусот останува на повеќе инвестиции, подобра инфраструктура, повеќе зеленило и поквалитетни услови за живот. Карпош продолжува да се развива со конкретни проекти и видливи резултати“, велат од ВМРО-ДПМНЕ.