ВМРО-ДПМНЕ: Ново училиште, градинка и финансиска поддршка за младите – Карбинци се развива со конкретни инвестиции

ВМРО-ДПМНЕ ги презентира резултатите од работата во Општина Карбинци во изминатата година, посочувајќи на инвестиции во образованието и инфраструктурата, како и на финансиска поддршка за деца, млади и семејства.

Од партијата велат дека во Радање е изградена нова училишна зграда, додека со доградбата на градинката „Кокичиња“ се обезбедува простор за околу 100 дополнителни деца.

— реклама —

Меѓу инфраструктурните проекти го издвојуваат и изградениот пешачки потег меѓу Таринци и Карбинци во должина од 1,5 километри, како и инвестициите во нови улици и подобрување на уличното осветлување.

„Се реализираат и капитални проекти како каналот Герен во Долни Балван и регулацијата на реката Брегалница, со кои се решаваат долгогодишни проблеми и се создаваат побезбедни и подобри услови за живот“, соопшти ВМРО-ДПМНЕ.

— реклама —

Паралелно со инфраструктурните инвестиции, Општина Карбинци вовела и директна финансиска поддршка за повеќе категории граѓани. По 5.000 денари добива секое дете кое започнува во прво одделение, секој ученик кој ја започнува првата година од средното образование и студентите кои ја започнуваат првата година на државните универзитети.

— реклама —

За секое новороденче, пак, предвидена е финансиска поддршка од 10.000 денари.

„Ова можеби се финансиски средства кои на прв поглед не изгледаат големи, но за едно семејство значат поддршка во вистински момент“, велат од партијата.

— реклама —

Од ВМРО-ДПМНЕ наведуваат дека ова е само дел од реализираните активности во изминатата година и најавуваат продолжување на инвестициите во сите населени места во општината.

„Карбинци се движи напред со работа, инвестиции и јасна визија за иднината. Општина Карбинци продолжува да работи за секое населено место и за секој граѓанин“, порачуваат од ВМРО-ДПМНЕ.