ВМРО-ДПМНЕ преку соопштение реагираше на обвинувањата од СДС во врска со случајот со владин вработен осомничен дека побарал и примил пари за посредување при вработување, оценувајќи дека опозициската партија се обидува да ја попречи борбата против корупцијата.
Од партијата велат дека митото со кое бил фатен осомничениот нема никаква поврзаност со генералниот секретар на Владата, Игор Јанушев, ниту, како што тврдат, тој бил вмешан во случајот.
„Очигледно е дека СДС сака да ја попречи и акцијата за сузбивање на корупцијата, измислувајќи клевети, лаги и невистини“, наведуваат од ВМРО-ДПМНЕ.
Од партијата додаваат дека случајот бил успешно разрешен благодарение на подготвеноста на лицето од кое било побарано митото да го пријави случајот и да соработува со надлежните со означени пари.
Според ВМРО-ДПМНЕ, носителите на функции не се повлекле и не калкулирале, туку овозможиле случајот да добие правна разрешница.
„Во нивниот светоглед е неприфатливо законот да важи за сите подеднакво и затоа тие не можат или не сакаат да ја разберат неселективноста во борбата против корупцијата“, се наведува во реакцијата.
Од ВМРО-ДПМНЕ воедно ја обвинуваат СДС за корупција во периодот кога била на власт, при што ги споменуваат Драган Рашковски, Венко Филипче и Зоран Заев.
„Сега борбата против корупцијата не познава припадност и не прифаќа калкулации“, велат од партијата.
Во реакцијата ВМРО-ДПМНЕ упатува и апел до медиумите да не објавуваат, како што наведуваат, клеветнички и невистинити содржини, туку да се придржуваат до проверени и официјални информации.
