ВМРО-ДПМНЕ преку соопштение оценува дека македонската економија бележи значително забрзување, посочувајќи го растот од 1,6 проценти во 2024 година на 4,3 проценти во вториот квартал од 2026 година како доказ за успешноста на економските политики на Владата.
Од партијата наведуваат дека најновите податоци покажуваат дека растот не се должи само на еден сектор. Според нив, инвестициите се зголемиле за 16,5 проценти, извозот на стоки и услуги за 10,4 проценти, додека градежништвото бележи раст од 21,9 проценти.
Позитивни движења, како што посочуваат од ВМРО-ДПМНЕ, се регистрирани и во преработувачката индустрија, трговијата, транспортот, угостителството и секторот на информатичките и комуникациските технологии.
Од партијата оценуваат дека растот на повеќе сектори истовремено покажува зголемена економска активност, повеќе инвестиции и производство, како и зголемен извоз, што, според нив, создава услови за нови работни места и натамошни инвестиции.
ВМРО-ДПМНЕ особено го истакнува податокот за инфлацијата, која, според нив, изнесува 2,3 проценти, оценувајќи дека забрзувањето на економијата не е проследено со нов инфлаторен притисок.
„Економскиот раст не е цел сам за себе. Тој е средство за подобар живот на граѓаните“, наведуваат од партијата.
Од ВМРО-ДПМНЕ додаваат дека Владата ќе продолжи со, како што велат, предвидлива економска политика, поддршка за инвестициите и приватниот сектор, реализација на капиталните проекти и создавање услови за отворање нови работни места.
„За само две години, економијата премина од раст од 1,6 проценти на 4,3 проценти. Тоа е мерливо, широко распространето и реално економско забрзување“, наведуваат од ВМРО-ДПМНЕ.
