ВМРО-ДПМНЕ во партиско соопштение тврди дека во периодот кога Венко Филипче беше министер за здравство, Министерството располагало со стотици анализи кои укажувале на неисправна вода за пиење, а јавноста не била навремено информирана за потенцијалните ризици.
Од партијата наведуваат дека станува збор за околу 400 анализи во кои биле утврдени различни неправилности во квалитетот на водата, при што, според нив, не биле преземени соодветни мерки ниту граѓаните биле предупредени да не ја користат водата.
Во соопштението се посочуваат неколку случаи кои, според ВМРО-ДПМНЕ, биле евидентирани во официјални извештаи. Меѓу нив е неисправна вода во здравствен дом во Македонска Каменица на 12 август 2021 година, неисправна вода на чешма пред училиште во селото Гумалево, Општина Зелениково, на 27 јули 2021 година, како и случај во Дебарца од 29 јуни 2021 година, кога било утврдено отсуство на резидуален хлор во локалниот водовод.
Партијата наведува и дека на 11 мај 2021 година во Требеништа, Општина Дебарца, била утврдена микробиолошка контаминација со бактеријата Ешерихија коли, а на 6 јули истата година, во одморалиштето Пониква кај Кочани, анализите покажале зголемен број бактерии и присуство на истата бактерија.
Од ВМРО-ДПМНЕ прашуваат зошто, доколку овие информации биле познати на Министерството за здравство, јавноста не била навремено известена и зошто не биле преземени мерки за отстранување на ризикот.
Партијата тврди дека молчењето во вакви случаи отвора прашања за институционална одговорност и побара Јавното обвинителство темелно да го испита случајот, вклучително и дали имало прикривање на информации и дали со непостапувањето биле загрозени здравјето и животите на граѓаните.
Во соопштението се наведува и дека веќе се поднесени пријави до Министерството за внатрешни работи, а од ВМРО-ДПМНЕ порачуваат дека очекуваат целосно расчистување на случајот и утврдување евентуална одговорност.
