ВМРО-ДПМНЕ повторно го повика Филипче: Ако има докази за 37 милиони евра кај хеликоптерите, нека ги достави во Обвинителството

ВМРО-ДПМНЕ повторно го повика претседателот на СДСМ, Венко Филипче, да ги објави и да ги достави до надлежните институции сите информации со кои располага во врска со набавката на осумте армиски хеликоптери, откако тој јавно ја спомена поранешната министерка за одбрана Славјанка Петровска и разлика од 37 милиони евра.

Од владејачката партија велат дека станува збор за сериозни наводи кои треба да бидат институционално проверени и бараат Филипче да одговори од кога располага со информациите, зошто досега не ги објавил и дали поседува документи или други докази.

„Венко Филипче конечно прозборе за сомнежи за сериозни злоупотреби во редовите на СДС“, велат од ВМРО-ДПМНЕ.

— реклама —

Партијата се повикува на неодамнешната изјава на Филипче во која тој, зборувајќи за Славјанка Петровска, праша дали причината за нејзиното однесување е „изјавата на Мисајловски дека потпишала за 37 милиони евра поскап договор за хеликоптери, откако Комисијата донела друга одлука“.

ВМРО-ДПМНЕ ова го толкува како сомнеж што Филипче го изнел за Петровска и бара од него да каже со какви информации располага.

„Ова се наводи за сериозни финансиски средства и затоа Филипче има обврска пред граѓаните да одговори: Од кога ги знае овие информации? Зошто молчел досега? Кои документи и докази ги поседува? Кој го потпишал договорот и врз основа на што?“, прашуваат од партијата.

— реклама —

Оттаму го повикуваат Филипче, доколку располага со сознанија за евентуални незаконитости, да ги достави до Јавното обвинителство.

„Ако Филипче навистина располага со информации за сомнежи за криминал, тогаш нема простор за селективност, калкулации или меѓупартиски пресметки. Нека ги достави информациите до надлежните институции и нека ги презентира пред обвинител“, велат од ВМРО-ДПМНЕ.

Според партијата, Јавното обвинителство треба да ги провери јавно изнесените наводи и да утврди дали постојат основи за понатамошно постапување.

— реклама —

ВМРО-ДПМНЕ истовремено го повикува Филипче да објави и други информации доколку располага со сознанија за можни незаконитости во СДСМ.

„Ако Филипче знае за овој случај и има информации за други вакви случаи, да ги пријави. Затоа го повикуваме да не застанува на овој случај. Ако има информации или сомнежи за други незаконитости во СДС, нека ги објави и нека ги достави до надлежните институции“, се наведува во реакцијата.

Од партијата додаваат дека јавноста има право да добие одговор за секој договор за кој постојат сомнежи и за начинот на кој биле трошени јавните средства.

Договорот за набавка на осум нови армиски хеликоптери од типовите AW149 и AW169M од италијанската компанија „Леонардо“ беше потпишан во март 2024 година, во времето кога Петровска беше министерка за одбрана.

Тогаш Министерството за одбрана соопшти дека пакетот, покрај осумте хеликоптери, опфаќа логистичка поддршка, опрема, резервни делови, тренажер, обука на летечкиот и техничкиот персонал и изградба на инфраструктурен објект. Петровска подоцна ја наведе вкупната вредност од 249,9 милиони евра.

Засега јавно изнесеното тврдење за разлика од 37 милиони евра не претставува утврдено кривично дело, а ВМРО-ДПМНЕ бара наводите да бидат проверени од Обвинителството.