Владејачката ВМРО-ДПМНЕ обвини дека СДСМ и лидерот на партијата Венко Филипче не можат да ги прифатат успесите што, според нив, ги постигнува државата на домашен и меѓународен план, па затоа продолжуваат со критики кон Владата.
Од партијата велат дека Владата предводена од ВМРО-ДПМНЕ води политика која ги штити државните интереси и обезбедува напредок без, како што наведуваат, отстапки на сметка на македонскиот идентитет и националните интереси.
Според ВМРО-ДПМНЕ, во изминатиот период Македонија добила значајни меѓународни признанија, меѓу кои го посочуваат изборот за членка на Економско-социјалниот совет на Обединетите нации (ЕКОСОК) за периодот 2027-2029 година, како и позитивните оценки за спроведувањето на реформската агенда.
Од партијата потсетуваат и на усвојувањето на нацрт-извештајот на Комитетот за надворешни работи на Европскиот парламент, како и на завршувањето на постмониторинг-процесот со Советот на Европа, оценувајќи дека тоа претставува потврда за демократскиот капацитет на државата.
Во соопштението ВМРО-ДПМНЕ упатува остри критики кон Венко Филипче и СДСМ, обвинувајќи ги дека бараат уставни измени и водат политика што, според партијата, не е во согласност со националните интереси.
„Додека Владата ја позиционира Македонија како достоинствена и почитувана европска држава, СДСМ и Венко Филипче продолжуваат со политики кои не придонесуваат за државните интереси“, наведуваат од ВМРО-ДПМНЕ.
Од партијата порачуваат дека државата продолжува да се развива, да гради меѓународни партнерства и да добива доверба од меѓународната заедница.
