ВМРО-ДПМНЕ: СДС и Филипче се против независноста, не можат да го надминат сопствениот срам

ВМРО-ДПМНЕ реагира на критиките од претседателот на СДСМ, Венко Филипче, за видеото посветено на 35-годишнината од независноста на Македонија. Од партијата велат дека видеото носи порака која обединува и го обвинија СДСМ дека повторно застанува „на погрешната страна“.

Од ВМРО-ДПМНЕ прашуваат зошто на СДСМ му пречи присуството на првиот претседател на независна Македонија во видеото, нагласувајќи дека тој бил избран консензуално. Во партиската реакција се посочува и дека СДСМ го критикува отсуството на содржини поврзани со НАТО, но, како што велат од ВМРО-ДПМНЕ, молчи за промената на името на државата.

— реклама —

Од партијата додаваат дека СДСМ реагира и затоа што во видеото нема содржини поврзани со Никола Груевски, како и дека се прават споредби за тоа кој колку придонел во изминатите 35 години.

„Ова е спот за дел од позитивните страни во овие 35 години. За негативните уште не е снимен, но таму Заев и Венко се во главна улога, а народот сето тоа го памети“, стои во реакцијата на ВМРО-ДПМНЕ.

— реклама —

— реклама —

Од партијата го критикуваат и начинот на кој, како што наведуваат, Филипче го политизира видеото и велат дека станува збор за содржина која граѓаните ја разбираат и прифаќаат како прослава на независноста.

ВМРО-ДПМНЕ оценува дека актуелното раководство на СДСМ нема капацитет „да ја види големата слика“ и да ги надмине партиските поделби.

„Згрозени сме од нивото на политичка култура на Венко Филипче“, наведуваат од ВМРО-ДПМНЕ, додавајќи дека повеќе нема да ја коментираат партијата која, според нив, „го донесе најголемиот срам и криминал во овие 35 години“.