ВМРО-ДПМНЕ ја обвини СДС дека шири паника и дезинформации во јавноста, тврдејќи дека опозициската партија пласира стар извештај за квалитетот на водата во Велес како да е актуелен.
Од ВМРО-ДПМНЕ велат дека извештајот на кој се повикува СДС е од февруари 2025 година и се однесува на селото Сливник во Општина Велес, кое, според нив, не е поврзано со градскиот водовод.
„Наместо факти, СДС свесно шири застарени информации за да предизвика вознемиреност кај јавноста“, наведуваат од партијата.
Во соопштението се тврди дека СДС и минатата година ширела паника во врска со пожарите, а годинава, според ВМРО-ДПМНЕ, се обидува да создаде страв кај граѓаните преку темата за загаденоста на водата.
Од владејачката партија оценуваат дека ширењето, како што наведуваат, на паника и дезинформации е неодговорно однесување и обвинуваат дека СДС ја злоупотребува темата за здравјето на граѓаните за дневнополитички цели.
