ВМРО-ДПМНЕ со нови обвинувања за „Алта банка“: Бара истрага за кредитот од пет милиони евра

ВМРО-ДПМНЕ со ново соопштение за случајот со „Алта банка“ ги отфрла обвинувањата на СДСМ и Венко Филипче дека банката имала забрана за работење во Европската Унија, а истовремено бара Јавното обвинителство да ги испита нејзините деловни релации со поранешни владини функционери и кредитот од пет милиони евра за компанија поврзана со сватот на Али Ахмети.

— реклама —

Од ВМРО-ДПМНЕ тврдат дека документите покажуваат оти „Алта банка“ имала сопственички удел од 9,63 проценти во „Адико банка“, додека компанијата „Дипломат пеј“ поседувала 9,99 проценти од акциите. Во август 2024 година, според партиското соопштение, на двете компании им биле суспендирани гласачките права, откако австрискиот регулатор утврдил дека дејствувале заеднички како поврзани лица и заедно стекнале квалификуван удел од 19,62 проценти без претходно известување на надлежниот орган.

Од партијата нагласуваат дека станувало збор за регулаторна постапка поради ненавремено пријавување на акционерски удел, а не за забрана за работење на „Алта банка“ во Европската Унија од страна на Европската централна банка.

— реклама —

Во декември 2024 година, Дипломат пеј го продала својот удел на австриски инвеститор, по што во февруари 2025 година, била укината суспензијата на гласачките права на Алта пеј во Адико банка, констатирајќи дека повеќе не постоеле услови за заедничко дејствување меѓу двете компании. Овие околности јасно покажуваат дека случајот се однесува на конкретна регулаторна обврска при стекнување акционерски удел, а не на забрана за работа во ЕУ, со што сите гали и манипулации на СДС и Филипче паѓаат во вода, велат од ВМРО-ДПМНЕ.

— реклама —

Од ВМРО-ДПМНЕ потсетуваат дека во 2023 година, на предлог на тогашниот министер за финансии Фатмир Бесими, на владина седница била разгледувана точка за деловни односи со „Алта банка“.

Според објавените информации на кои се повикува партијата, две години подоцна компанија во која учествува „АС Сењак“, фирма поврзана со сватот на лидерот на ДУИ Али Ахмети, добила кредит од пет милиони евра од „Алта банка“ во Белград.

— реклама —

ВМРО-ДПМНЕ прашува дали тогашниот министер и владата предводена од СДСМ и ДУИ знаеле какви деловни односи се воспоставуваат со банката, како бил одобрен кредитот и кои гаранции биле дадени. Партијата бара Јавното обвинителство да ги испита владините одлуки, кредитот и сите евентуално поврзани трансакции.