ВМРО-Народна партија во своето соопштение изрази загриженост за начинот на избор на новиот директор на Македонска радио-телевизија, оценувајќи дека процесот бил спроведен без доволна транспарентност и со, како што наведуваат, прекршување на законите.
Од партијата во соопштението посочуваат дека изборот на раководно лице во јавен сервис треба да биде заснован на јасни и мерливи критериуми, наместо, како што тврдат, на блискост со власта.
„Кога критериумот на пријателство со моќници од власта преовладува над стручноста, јавниот сервис престанува да биде во служба на граѓаните“, наведуваат од ВМРО-Народна партија во соопштението.
Според нив, особено проблематичен е недостигот на образложение за донесената одлука, како и отсуството на транспарентни критериуми врз основа на кои е направен изборот меѓу кандидатите, стои во соопштението.
Партијата во своето соопштение укажува и дека како клучен фактор во изборот била земена предвид предлог-програмата за работа, која, како што велат, претставува визија, а не конкретно мерлива реализација.
Од ВМРО-Народна партија бараат целосна транспарентност во процесот, вклучително и јавно објавување на биографиите, бодовната листа и програмите на сите кандидати за директор на МРТВ, стои во соопштението.
Тие во своето соопштение нагласуваат дека јавниот радиодифузен сервис мора да функционира врз принципи на професионалност, објективност и отчетност кон граѓаните.
