Министерството за внатрешни работи поднесе кривична пријава против полициски службеник од Полициската станица Центар, осомничен дека без основ употребил физичка сила врз приведено лице на кое рацете му биле врзани со лисици.
Од МВР соопштија дека Одделот за внатрешна контрола, криминалистички истраги и професионални стандарди до Основното јавно обвинителство за гонење организиран криминал и корупција поднел кривична пријава против А.Т. поради сомнение дека го сторил кривичното дело „малтретирање во вршење на службата“.
Според информациите, инцидентот се случил на 24 мај 2026 година, околу 2:53 часот, кај фонтаната во Градскиот парк на булеварот „Илинден“, додека полицаецот преземал службени дејствија кон лице лишено од слобода.
„При вршење на службени дејствија кон лишено од слобода, на кое рацете му биле врзани со лисици, без основ употребил физичка сила и му задал удар во грбот. Со наведеното дејствие тој постапил на начин со кој се понижува човековото достоинство и личност“, соопштија од МВР.
Освен кривичната пријава, Одделот за внатрешна контрола ќе поднесе и предлог за поведување постапка за утврдување одговорност поради кршење на работната дисциплина против полицискиот службеник.
