Мала етикета на багажот може да ве доведе во сериозни проблеми, па дури и да бидете погрешно обвинети за шверц на дрога, предупредуваат истражувачи кои откриле загрижувачка шема на злоупотреба на аеродромскиот систем за багаж.
Откако патниците ќе го предадат својот багаж на аеродром, куферите се транспортираат во зони до кои патниците немаат пристап. Токму во тие простории, според истрагите, може да дојде до злоупотреба од страна на корумпирани вработени.
На канадскиот аеродром „Пирсон“, каде што досега се регистрирани најмалку 16 вакви случаи, постојат илјадници безбедносни камери, но не сите се следат во секој момент, а одредени делови остануваат надвор од нивниот опсег.
Според истражувачите, доволно е еден вработен да ја отстрани етикетата од багажот на патникот и да ја постави на друг куфер во кој се наоѓа дрога. Така, нелегалниот багаж патува кон истата дестинација како и патникот, а на крајот го преземаат лица кои преку уреди за следење го лоцираат куферот.
Во меѓувреме, оригиналниот багаж на патникот може да биде испратен без етикета или да добие т.н. итна ознака, која вообичаено се користи за изгубен или оштетен багаж. Во многу случаи, патниците воопшто не забележуваат дека нивниот багаж бил предмет на манипулација.
Досега се идентификувани најмалку 17 случаи, но се стравува дека бројот на патници чии етикети биле злоупотребени е значително поголем.
Во одредени случаи, сторителите дури ја сечат оригиналната етикета на два дела – едниот дел останува кај патникот, а другиот се прикачува на куферот со дрога. Доколку таквиот багаж биде откриен, патникот може да се најде во ситуација да докажува дека спорниот куфер не е негов.
Експертите ги предупредуваат патниците внимателно да ги проверуваат ознаките на својот багаж по пристигнувањето и веднаш да пријават доколку забележат некакви неправилности.
