Голема акција на МВР и Обвинителството за гонење на организиран криминал и корупција. Во Грчец и Гази Баба, Чаир и Сингелиќ запленета поголема количина дрога, пари, автомобили и мобилни телефони. Неофицијално приведени се над 20 лица.
Обвинителката Вилма Русковска во изјава за медиумите кажа дека тие имаат докази дека приведените лица сториле кривично дело „недозволена трговија со опојни дроги“. Пред акцијата не е спроведена финансиска истрага, од страв дека акцијата може да биде пробиена, но од понеделник ќе следи и финансиска истрага.
„Цела година собиравме докази, имаше ПИ-мерки, слушање комуникации и следење. Приведени се 21 лице, тие се наоѓаат во повеќе полициски станици, а како што сум информирана, по одредени лица сѐ уште се трага“, истакна Русковска, која се надева дека утре ќе излезат на прес-конференција и ќе соопштат повеќе детали.
Русковска додаде и дека до сега нема осомничени полициски службеници, но понатаму ќе бидат вештачени одземените мобилни телефони и доколку се најде комуникација сигурно дека ќе бидат осомничени и овластени службени лица.
фото: Архива
