Во Германија казнуваат ако останете без гориво на автопат

Возачите во Германија може да добијат парична казна ако останат без гориво на автопат, а истото правило важи и за електричните автомобили, на кои ќе им се испразни батеријата. Основната казна изнесува 35 евра, но во одредени околности може да достигне 70 евра, плус казнен бод.

— реклама —

Според германските правила, останувањето без гориво или електрична енергија не се смета за непредвидлив дефект, бидејќи возачите можат да го следат нивото на гориво или наполнетоста на батеријата. Предупредувачките сигнали им овозможуваат навреме да побараат бензинска станица или полнач, пишува „Ревија ХАК“.

— реклама —

Полицијата може да ги казни возачите чии возила ќе застанат на автопат поради празен резервоар или испразнета батерија. Ако возилото остане запрено подолго од три минути, тоа може да се смета за паркирање на автопат, што е забрането. Во тој случај, казната може да изнесува 70 евра, а возачот може да добие и еден казнен бод.

— реклама —

Трошоците може да бидат уште повисоки ако возилото запре на особено опасно место или ако поради таквата ситуација дојде до сообраќајна несреќа.

Затоа, на возачите им се советува, пред да тргнат на автопат, да го проверат нивото на гориво или наполнетоста на батеријата и навреме да ги испланираат запирањата. Пропуст што лесно можел да се избегне може да доведе не само до парична казна, туку и до опасност во сообраќајот.