Во Грција, по експлозија на плинска боца во изнајмен апартман во која беа повредени пет туристи, полицијата веднаш го приведе 86-годишниот сопственик на објектот.
Адвокатот Владимир Туфегџиќ, застапник на семејството на трагично починатиот Љупчо Лешко, ја спореди оваа реакција со односот на институциите во Македонија, каде што, по смртта на младиот Лешко во „див“ угостителски објект, никој не е приведен и нема преземена одговорност.
„Некој ќе рече – каква врска има газдата, плинска боца може да експлодира било каде. Еве зошто има врска: кај нас загина млад човек во објект со шанк, маси, столици, озвучување и јавна промоција на адресата за издавање на Инстаграм. Наместо истрага, се прават надчовечки напори случајот да се прикаже како несреќен случај,“ вели Туфегџиќ.
Тој додава дека единствено вишиот јавен обвинител, во жалбена постапка, наложил повторно постапување, бидејќи го видел она што, според него, „понискиот“ обвинител и дел од полициските службеници и вештаци „не можеле“ да го видат.
„Наместо непристрасна истрага, си формираа телефонско мислење и ‘ненамерно’ ги контаминираа доказите,“ вели адвокатот, нагласувајќи дека станува збор за прашање на одговорност.
