Претседателот на СДСМ, Венко Филипче, ги отфрли обвинувањата на премиерот Христијан Мицкоски дека за време на неговиот мандат како министер за здравство јавноста не била информирана за случаи на неисправна вода за пиење.
Според Филипче, во периодот кога тој бил на чело на Министерството за здравство немало труење со вода, ниту епидемија во Гостивар.
„Во мое време немаше труење со вода, ниту епидемија во Гостивар. Мицкоски вчера мавташе со некакви документи, но освен што постојано се повикува на обвинителството, не нуди конкретни решенија“, изјави Филипче на брифинг со новинарите.
Тој оцени дека институциите реагирале предоцна на состојбата во Гостивар и дека препораките од Министерството за здравство и Комисијата за заразни болести дошле откако епидемијата веќе земала замав.
Филипче потсети дека уште пред две недели предупредил дека постои ризик од појава на хепатит како последица на загадената вода и недоволните хигиенски услови.
„Ако водата е загадена, логично е да постои ризик од појава на хепатит. Тоа е основно медицинско знаење. Наместо навремени мерки, гледаме задоцнета реакција и импровизација“, рече тој.
Тој упати критики и за препораките граѓаните да користат техничка вода, поставувајќи прашања за нејзиното потекло и безбедност.
„Кој ја контролира техничката вода? Од каде доаѓа? Како се користи во угостителските објекти и кој гарантира дека е безбедна? Граѓаните заслужуваат јасни одговори, а не дополнителна неизвесност“, изјави Филипче.
