Мраз со ешерихија коли и колиформни бактерии се продавал во Радовиш, го прозиведувале во подрум во нехигиенски услови, запленети 850 килограми

Двајца жители на Радовиш се соочуваат со кривична пријава откако полицијата утврдила дека повеќе години неовластено произведувале и продавале мраз во импровизирани и нехигиенски услови. При анализите на готовиот производ биле пронајдени ешерихија коли и колиформни бактерии.

СВР Струмица-ОВР Радовиш поднела кривична пријава до Основното јавно обвинителство Радовиш против Т.Д. (62) и С.Д. (62), поради сомнение за продолжено кривично дело „производство и пуштање во промет штетни прехранбени и други продукти“.

— реклама —

На 16 септември, по судска наредба, полициски службеници во координација со државен инспектор за храна од Агенцијата за храна и ветеринарство извршиле претреси на четири локации што ги користеле пријавените.

Во приземниот дел од нивниот дом биле пронајдени замрзнувачи со поголем број вреќички со коцки мраз, оставени за продажба по принцип на самопослужување. Парите од продажбата се оставаале во посебна кутија.

— реклама —

Во подрумските простории биле пронајдени четири машини за производство на мраз и уште еден фрижидер-замрзнувач со поголема количина спакуван мраз.

По насоки на државниот инспектор, биле земени примероци од водата што се користела како суровина, готовиот мраз и брисеви од опремата. Анализите покажале дека само примерокот од водата ги исполнувал потребните параметри за безбедност и квалитет.

Во останатите примероци биле потврдени ешерихија коли и колиформни бактерии, поради што било утврдено дека мразот не бил безбеден за употреба и претставувал ризик по здравјето на луѓето.

— реклама —

По добивањето на резултатите, Агенцијата за храна и ветеринарство ги запечатала и одзела машините за производство на мраз и замрзнувачите, како и околу 850 килограми готов производ.

При претресите било утврдено и дека водата за производство се доведувала преку приклучоци поставени на повеќе места. Од ЈП „Плаваја“ Радовиш било констатирано дека водата што се користела во подрумскиот дел не се мерела преку водомер.

На друга локација, во објект на место викано „Гладно Поле“, во атарот на Радовиш, за кој било утврдено дека е бесправно изграден, била пронајдена и воздушна пушка без соодветна документација.

Двајцата пријавени биле лишени од слобода и задржани во Полициската станица Радовиш. За бесправно изградениот објект и воздушната пушка, по целосното документирање, ќе бидат поднесени дополнителни соодветни пријави.